我察覺到唔少朋友即使假日都放唔低日常嘅公事同壓力，白白浪費咗個假期。所以我今日想同大家分享3個「#真正為自己叉電」嘅方式，令你喺呢個長假中，可以提升心靈健康、紓解壓力。
喺疫情之中，我聽到好多朋友home office時，經常工作到不知時日，大呻仲攰過返公司。其實，我哋成日以為做得長時間，就等於表現好，忽略咗生活，亦都唔明白保持工作效率嘅重要性。所以，我建議大家需要分清工作同休息時間，切忌俾工作入侵私人時間，咁先可以保持生活平衡，以及穩定工作表現。第一步，大家可以先喺休息時關閉工作電話，唔好喺食飯、娛樂時都回覆訊息。有朋友可能即刻問：「唔得㗎，如果有急事搵我點算？」如果係咁，大家就需要好好規劃工作時間表，確保收工前妥當安排每項任務，例如係訂下工作死線 (internal deadline)，就可以令你掌握工作進度，杜絕「急事」打擾生活。
第二個建議係培養個人興趣。我曾經問過朋友：「點解你放假仲工作？」佢答：「我無其他嘢做，唯有做公司嘢。」反映咗缺乏興趣都可能會令人無法好好休息。以我自己為例，因為屋企有3隻狗狗，所以每逢假日，我都會同佢哋去到寵物公園放電，甚至做吓寵物義工，順便俾自己親親大自然，放鬆身心。即使你無養寵物，亦都可以發掘其他興趣，例如烘培、做運動、學新語言，學成嘅滿足感並唔係工作中可以收穫到。
最後，其實我哋喺office內都可以放鬆身心，例如係多啲同同事交流、Happy hour等。我哋成日覺得office係充滿壓力嘅地方，每朝踏入公司都好唔情願，甚至有心理恐懼。為咗擺脫呢個困局，我建議大家多利用休息時間，同同事交流生活瑣事，講吓家庭、音樂、購物，忙中偷一點閒，亦可以放鬆你心中嗰條繃緊嘅橡筋。
希望大家參考咗呢幾個貼士後，喺嚟緊嘅長假期都可以真正休息，陪吓親友，放鬆身心，假期後叉足電再投入工作。如果你都有啲relax自己嘅提議，不妨DM我或者喺下面留言分享！祝大家復活節快樂～
嚟緊我會喺唔同社交平台分享女性職場上既挑戰同心態，亦會繼續同大家講吓如何 建立小習慣 Be a Better Me!
歡迎留言或 inbox 我交流一下，可以訂閱我以下社交平台
YouTube:
Comments