【#升職之秘】要成功必要諗多步

Carrie Chan

2024年7月16日讀畢需時 2 分鐘

「本份」呢個詞語近日因為一段小學放榜嘅受訪片段引發唔同嘅迴響，現處職場嘅你單單做本份又夠唔夠呢？

唔知大家返工嘅時候有無聽過或者有咁嘅心態「我做咗我本份㗎啦」、「其他嘢唔係我跟開」。其實要受上司賞識，想升職加薪，除咗做本分，每樣嘢都要做多一步。是諗吓如果個個都係做本分，安分守己，根本就冇一個人會突圍而出，令自己「被看見」。

假設有個升職機會，而你又係老闆，你會揀一個做本分嘅職員，定係會揀一個做多一步嘅同事升職。相信大家心入邊都有個答案。

「要做好件事而唔係做咗件事」

你可以諗吓點樣可以將份工作做得更好，而唔係人哋話一就一，話二就二，做完就算。唔想喺職場被淘汰，就要識得進步，唔可以咁容易俾人取替到你嘅位置。

愛因斯坦說：瘋子就是重複做同樣的事情還期待會出現不同的結果。單單做好本分，只會令你過得安穩，而唔會喺群眾中突圍而出。

「報好多補習班，一個補習班係由周一至周五，放學就立即去。我覺得自己付出咁多，有回報都值得。辛苦就談唔上，因為讀書係我本份」呢段說話除咗小朋友的反應好可愛之外，其實都係好值我哋大人思考。小朋友佢除咗做好本分，佢亦會做出比本分更多嘅嘢，例如除咗上堂之外仲會參加補習班，每日都不停溫習，或者會喺人哋玩嘅時間佢都會選擇溫書。

正正體驗「沒有奇蹟，只有累積」呢一句說話。

好多人都會講「搏盡無悔」，但真正「盡」咗力嘅又有幾多個人，單單拼搏並不足夠，盡力而為先係無悔嘅人生。

如果你想了解更多，或想知道自己適唔適合做而家做緊嘅工作，想揾人分析下，歡迎大家留言／PM我傾。

#職場解話＃工作日常 #心態 #心靈雞湯 #工作 #生存之道 #生涯規劃 #揾工 #轉工