時間真係過得好快，Mirror 話咁快就成團三年啦！身邊啲朋友、同事都知我好鍾意Mirror，而我鍾意佢地嘅原因好簡單，鍾意佢地團結、活力充沛～其實最重要嘅係我喺佢地身上揾番追夢嘅熱情，諗起當初我點解會選擇投身保險呢一行！Mirror中文的翻譯係「鏡」，正正係呢12塊鏡反映咗現今年青人嘅寫照，甚至係你同我曾經嘅自己。
「態度決定你的高度」，呢句說話老生常談，卻係真理。你可以見到呢十二位年青人三年嚟有幾咁努力，先可以企喺全香港人眼前！佢地嘅努力大家有目共睹，記得有一次姜濤出席活動嘅時候暈倒，企喺佢身邊嘅團員都好擔心，Jer仲立即扶住佢。佢地三年嚟互相扶持，大家撐住對方，嗰種兄弟情係用錢都買唔到。記得當日Facebook同IG大家都討論「姜濤累倒」嘅事，影片見到姜濤前一刻仲好專業同粉絲打招呼，笑住面對傳媒，但下一秒就腳軟倒地，原來佢前一日已經直踩二十個鐘，無得好好休息就要出席下一個活動。咩驅使姜濤唔舒服都堅持頂硬上？除咗唔想令粉絲失望，我諗就係夢想。
為咗追夢可以去到幾盡？
「台上一分鐘，台下十年功」，佢地拼搏咗三年令到大家都認識Mirror係咩組合！其實相信唔止三年，三年前嘅佢地已經準備好，只差一個機會。「全民造星」可以話係佢地踏上夢想的舞台；「Mirror 」係佢地實現夢想嘅地方；而最終可唔可以跳到佢地想到的高度就要靠佢地自己。
好似Anson Lo咁，佢未加入MIRROR之前係職業舞蹈員同舞蹈老師，好多人都會話「跳舞揾唔到食」，但教主佢從來都無放棄，先可以走到大家眼前。直到「#大叔的愛」令到更多人知道邊個係盧瀚霆，令到大家明白咩係愛。
Mirror 擁有12個唔同嘅背景，嚟自12個唔同嘅家庭，身上擁有12個屬於佢地嘅故事。佢地呢幾年黎真係好努力，好奮鬥去追尋自己嘅嘢，遇到任何困難都無選擇放棄。雖然每個人追尋嘅事物都唔同，惟一相同嘅就係我地都係勇敢努力追夢嘅人，一直向前。
當你想放棄嘅時候可以諗下：「點解佢地得，自己就唔得？」人生好似一門學問咁，無論幾多歲都需要不斷學習，增值自己。好似Mirror 咁，靚唔靚仔真係好主觀，但相信鏡粉們都係被佢地由心而發的努力、對夢想嗰種追求同渴望而吸引到，佢地每一個都有值得人學習同鍾意嘅地方，唔需要比較，因為佢地都係獨一無二嘅。
ALL IN ONE！ 12-1=0！
佢地互補長短、互相扶持，相信呢十二塊鏡能夠繼續發光發亮，繼續帶歡樂同正能量俾香港人。Mirror 而家所得到嘅，都係用汗水、努力、辛酸換返黎。付出唔一定有回報，夢想好似場賭博咁，但唔嘗試去實現，你就一定係輸家！
Commenti