喺呢兩年，唔少朋友固有嘅消費習慣因為疫情而徹底改變，好似去旅行等消費大大減少，照道理，每個人都會儲到一大筆錢先啱，但事實上大部分人都做唔到，甚至「洗突咗」。同大家分享一個有趣嘅見聞——有日我喺𨋢到聽到兩位三十幾歲男士嘅對話，男士A話：「唉，今年去唔到旅行，但我剩返嘅錢洗埋嚕。啲錢好似會拮著我咁，哽著我褲袋！」
如果你都明白男士A唔洗唔安落嘅心態，可能你都喺疫情下儲唔到錢嘅一群，將原本旅行嘅錢轉移咗去其他高消費項目，好似貴價staycation、換新電話等等。雖然理財係好個人化嘅事，無分對錯，但如果你回顧過去一年，啲錢洗得有啲後悔，希望來年可以多啲儲蓄嘅話，不妨都參考下以下幾個原則：
一，學識先儲後花，儲蓄永遠比洗錢優先。我建議大家每逢出糧日，第一時間將一定金額轉帳去一個「不動戶口」，意思即是如非人生大事，你都絕對唔會動用裡面嘅錢。扣除嗰一份儲蓄之後，剩低嘅先係你當月可以花費嘅金錢，咁樣嘅話，就唔怕每個月都有「洗突咗」嘅情況。
二，學識投資，唔好俾你嘅儲蓄貶值。大家可能都知道，現金放喺銀行係追唔上通脹，令你嘅收穫逐個月「縮水」。所以，大家需要識得評估自己承受風險嘅程度，再將資產投資落唔同市場。假設你剛剛出來做嘢，本金少但可以嘗試唔同嘅投資方式，咁就可以考慮將一半做個穩定儲蓄，例如買份醫療、危疾保險，儲錢之餘亦可應付突如其來嘅醫療開支；而另一半就可以試試買落去優質股票，甚至物業市場，投資之餘，亦都學到資產世界嘅運作。
三，學識自律，建立長久嘅良好理財態度。堅持同自律係理財中最重要嘅一環，即使我哋完全做到以上兩點，但只係三分鐘熱度，到最後都好難擁有理想嘅財富。所以，我建議所有剛剛開始理財習慣嘅大家，先設定一個目標俾自己，例如半年之內，每個月要儲起25%收入。半年計劃完成之後，你已經有初步嘅理財規律同自覺性，接下來就可以設定長久、高目標嘅儲蓄計劃，最後培養出理財自律性。
每個人都有自己嘅理財方法，但萬變不離其宗，只要我哋有儲蓄嘅自覺性同決心，就已經離成功不遠！希望呢篇文章可以幫你喺2021年，有個豐盛嘅財富增長。如果你睇過我嘅影片或文章，有啲理財或自我提升嘅心得或疑難想分享，歡迎PM我傾傾或者喺下面留言。
YouTube:
Commentaires