無論係上月 姜濤 生日，定今個月 MIRROR 連開6場演唱會，Mirror、Error呢啲年輕組合都「洗版式」出現喺我哋嘅社交網絡。有啲朋友問我：「Carrie，你識唔識呢啲組合？睇落都係啲『得個樣』嘅𡃁仔，同九十年代紅星邊有得比？」對於呢個論述，我非常唔認同。由《#全民造星1》睇到今日嘅mirror，香港後生仔俾我嘅感動，比所謂世界級紅星都要多，佢哋嘅志氣同堅持，令我可以講一句：「香港年輕人唔係廢青！」
首先，香港年輕人所面對嘅難題並非上一輩能夠感受。對普通後生仔來講，默默耕耘亦難以上樓，安居樂業；而娛樂圈更加係面對斷層，創意工業水平俾韓國等大幅拋離。但，我哋嘅新生代從無放棄過，更加好似姜濤喺Chill Club頒獎禮中豪言：「會再次成為亞洲第一」，志氣可嘉。
喺呢波Mirror熱潮下，我近排重溫返《全民造星1》，可能大家對當中好多參賽者已經無晒印象，但佢哋嘅真誠同努力令我感受好深，團隊精神亦好打動到我。其中一集係講花姐帶領55強出席live節目，佢好不滿整體彩排表現，喺旅遊巴上大鬧一班大男生，更加決定抽起其中5人嘅表演機會。面對令人咁難堪嘅情景，我好記得Lokman、阿Dee、嚴祺等人無責怪隊友，而係利用show前一個鐘幫隊友排好隻舞，令55人可以齊整出show。正正係呢幕，就證明到我哋嘅年輕人具備無私、堅韌同團隊精神，大家並唔係由自身利益出發，而係會努力成就彼此夢想嘅一代。
香港人成日被形容為冷漠嘅一群，但我喺呢班後生仔身上睇到另一種希望。不論喺娛樂圈定社會，我哋都需要年輕一代注入熱情、志氣，再次將香港推動向前。喺呢度我希望分享阿Dee喺《造星》一句話：「如果我哋最後出來（表演）畀人講，唔緊要，時間會證明一切，希望可以俾個機會我哋。」我哋嘅社會如果願意俾多啲機會後生仔，我認為佢哋可以憑出色嘅創造力同堅持，帶領各行業「浩浩蕩蕩迎來另一新世紀」。
如果各位年輕人喺生活遇到困惑，歡迎inbox或者喺下面留言同我傾傾，以你哋嘅特質，可以達到嘅成就一定比想象中遠大，共勉之！
嚟緊我會喺唔同社交平台分享女性職場上既挑戰同心態，亦會繼續同大家講吓如何建立小習慣 Be a Better Me!
歡迎留言或 inbox 我交流一下，可以訂閱我以下社交平台
YouTube:
Comments